Plantun de Prouvènço

Pèr coumpara dos planto d'encò nostre

Narcissus dubius & Fissidens dubius

Tèsto-d'ase

Narcissus dubius

Amaryllidaceae

Autre noum : Judiéuvo.

Noms en français : Narcisse à bouquets, Narcisse de Gouan.

Descripcioun :
Mai pichoto que sa cousino la courbo-dono, la tèsto d'ase fai pamens de poulìdi flour touto blanco un cop maduro. Se destrio peréu que fai un couquet de flour e pas soulamen uno flour soulitàri. En mai d'acò si fueio soun bèn mai estrecho.

Usanço :
Touto la planto es empouisounanto e majamen la cabosso ounte s'atrobo forço acalouïde di proun dangerous. Ei pas couseia meme d'agué un couquet dins uno chambro que pau ensuca. Part acò li courbo-dono porton peréu lou noum de "mau-de-tèsto". Soun couneigudo desempièi li mège grè pèr èstre de bon boumitòri e douna uno espetaclouso fouiro. Mefisas-vous n'en.

Port : Erbo
Taio : 15 à 40 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Narcissus
Famiho : Amaryllidaceae

Coulour de la flour : Blanco
Petalo : 6
Ø (o loungour) flour : Pancaro entresigna
Flourido : Printèms Ivèr

Sòu : Ca
Autour basso e auto : Pancaro entresigna
Aparado : Noun

Liò : Garrigo - Roucaio - Paret
Estànci : Termoumediterran à Mesoumediterran
Couroulougi : Pancaro entresigna
Ref. sc. : Narcissus dubius Gouan, 1773

Mousso-divisado-doutouso

Fissidens dubius

Fissidentaceae

Nom en français : Fissident crête-de-coq.

Descripcioun :
Aquelo mousso dóu gènre Fissidens (peristome divisa, vèire li fotò) trachis sus li roco cauquiero e de cop que i'a au sòu. Es uno mousso pulèu pichoto auto de 1 à 3 cm. Fai partido dóu group qu'a ges de lòngui celulo sus lou bord de la fueio (fotò), pamens se vèi bèn uno bando de 3 à 4 cellulo pu claro. Se recounèis tambèn à sa pouncho de fueio emé un benc e que la costo s'acabo just avans lou bout (fotò). Es couneigudo pèr pas faire trop d'espouroufite, pamens sèmblo pas trop lou cas au nostre.

Usanço :
Se pòu counfoundre emé d'àutri meno dóu meme gènre subretout Fissidens taxifolius qu'a pas lou bout de fueio denta d'un biais irregulié e peréu que la costo vai fin qu'au bout dóu bènc (de vèire au microuscope).